Меѓу овогодишните новитети се катче со јапонска храна во стилот на izakaya, како и станица со свежо подготвено италијанско gelato (сладолед). Сепак, Пак истакна дека ѕвездите секогаш најмногу им се радуваат на проверените класици кои секогаш се на менито.
„’Comfort food’ секогаш оди најдобро, како што се нашата пилешка пита, пицата со димен лосос, макароните со сирење или мини хамбургерите“, откри Пак во пресрет на настанот.
Тој призна дека обидите за премногу иновации понекогаш не поминувале добро. „На некои забави велев: ‘Уморен сум од правење пици’, а гостите ми приоѓаа по јадењето и ме прашуваа: ‘Волфганг, каде е пицеријата?’“. Познатиот готвач исто така забележа дека гламурозните гости често се прилично гладни кога ќе пристигнат на раскошниот настан по самата церемонија на доделување.
Колку храна се троши за 1.500 гости?
„Сè се сведува на квалитетот на состојките и леснотијата на подготовка“, објасни тој. „Мораме да готвиме за 1.500 луѓе, па се држиме до едноставноста. Не ни требаат десет сосови за едно јадење“.
За подготовка на вака голема гозба потребен е импресивен тим: 75 готвачи задолжени за солени јадења, 45 слаткари и 325 членови на персонал и менаџери. Нивната задача беше да подготват околу 600 домашни пици, 3.000 ањолоти (agnolotti) со артичоки и 2.000 мини чоколадни статуетки Оскар.
Пак проценува дека во кујната ќе бидат потрошени околу 91 килограм „ribeye“ одресок, 136 килограми домашен димен лосос, 14 килограми кавијар Kaluga, 227 килограми диви печурки, 91 килограм нишики ориз и 181 килограм разни сирења. Како додаток на раскошот, околу 7,5 литри 24-каратно течно злато ќе биде искористено за украсување на чоколадните Оскари.
Извор: odrzime.rs
